[770] ปญฺจสีลทสสีลานิ วิญฺญาณสฺส ชาติยา จ ปจฺจยภูเตสุ สงฺขารภเวสุ อนฺโตคธานีติ ‘‘อุปฺปาทา วา’’ติอาทิกาย ธมฺมฏฺฐิติปาฬิยา สงฺคหิตานิฯ ภวนิพฺพตฺตกสีลสฺส ปญฺญาปนํ สติปิ สวเน น ตถาคตเทสนายตฺตนฺติ ภิกฺขุอาทีนมฺปิ ตํ วุตฺตํฯ

อธิปญฺญาย ปญฺญาติ อธิปญฺญาย อนฺโตคธา ปญฺญาฯ อถ วา อธิปญฺญานิพฺพตฺเตสุ, ตทธิฏฺฐาเนสุ วา ธมฺเมสุ อธิปญฺญา-สทฺโท ทฏฺฐพฺโพ, ตตฺถ ปญฺญา อธิปญฺญาย ปญฺญาฯ

[771] อปายุปฺปาทนกุสลตา อปายโกสลฺลํ สิยาติ มญฺญมาโน ปุจฺฉติ ‘‘อปายโกสลฺลํ กถํ ปญฺญา นาม ชาตา’’ติฯ ตํ ปน ปรสฺส อธิปฺปายํ นิวตฺเตนฺโต ‘‘ปญฺญวาเยว หี’’ติอาทิมาหฯ ตตฺรุปายาติ ตตฺร ตตฺร อุปายภูตาฯ ฐาเน อุปฺปตฺติ เอตสฺสาติ ฐานุปฺปตฺติยํฯ กิํ ตํ? การณชานนํ, ภยาทีนํ อุปฺปตฺติกฺขเณ ตสฺมิํเยว ฐาเน ลหุอุปฺปชฺชนกนฺติ วุตฺตํ โหติฯ

ติกนิทฺเทสวณฺณนา นิฏฺฐิตาฯ

(4.) จตุกฺกนิทฺเทสวณฺณนา

[793] น ปริตสฺสตีติ ‘‘อปิ นาม เม ตณฺฑุลาทีนิ สิยุ’’นฺติ น ปตฺเถติ, ตทภาเวน วา น อุตฺตสติฯ

[796] อปรปฺปจฺจเยติ ปเรน นปตฺติยายิตพฺเพฯ ธมฺเม ญาณนฺติ สจฺจวิสยํ ญาณํฯ อริยสจฺเจสุ หิ ธมฺม-สทฺโท เตสํ อวิปรีตสภาวตฺตาติฯ สงฺขตปวโร วา อริยมคฺโค ตสฺส จ ผลํ ธมฺโม, ตตฺถ ปญฺญา ตํสหคตา ธมฺเม ญาณํฯ น อญฺญญาณุปฺปาทนํ นยนยนํ, ญาณสฺเสว ปน ปวตฺติวิเสโสติ อธิปฺปาเยนาห ‘‘ปจฺจเวกฺขณญาณสฺส กิจฺจ’’นฺติฯ